Elbrus Hacı oğlu Allahverdiyev 27 oktyabr 1958-ci ildə anadan olub. Elbrus xeyli vaxt Vladiqafqazda yaşayıb, Qarabağ müharibəsi başlayanda Vətənə dönüb və könüllü cəbhəyə yollanıb. Leytenant Allahverdiyev Azərbaycan Silahlı Qüvvələri artilleriyasının ilk təşkilatçılarından olub. O, Ağdam cəbhəsində ilk artilleriya batareyasını, sonralar onun əsasında ilk divizionu təşkil edərək, döyüş əməliyyatlarında iştirak edib. 1993-cü il iyunun 16-da, ermənilərin hücumu zamanı Allahverdiyev mərmi partlayışından ağır yaralanıb. Komandir hospitala çatdırılsa da, onu xilas etmək mümkün olmayıb.
İqor Vladimiroviç Makeyev 27 oktyabr 1971-ci ildə fəhlə ailəsində anadan olub. Desant qoşunları hissəsində xidmət keçən İqor sonralar Rusiyanın Rostov vilayətindəki çavuş məktəbinə göndərilib, lakin Qarabağ müharibəsi başlayanda Gəncəyə dönüb və cəbhəyə yollanıb. Çox keçməmiş onu taqım komandirinin müavini vəzifəsinə təyin ediblər. Makeyev Xocalı, Ağdərə uğrunda gedən döyüşlərdə şücaət göstərib. 2 avqust 1992-ci ildə “Vışka” yüksəkliyi uğrunda gedən döyüşdə İqor Makeyev 28 nəfərin mühasirədən çıxmasına imkan yaradıb, özü isə şəhid olub.
Rəfael Əvəz oğlu Əsədov 27 oktyabr 1952-ci ildə anadan olub. Əsədov SSRİ Silahlı Qüvvələrinin məhdud kontingenti tərkibində Macarıstan, Vyetnam və Əfqanıstanda qulluq edib, polkovnik rütbəsinədək yüksəlib. Qarabağ müharibəsi başlayanda Əsədov Vətənə qayıdıb, müasir zenit batareyalarının yaradılmasında köməklik göstərib və artilleriya korpusunun komandiri təyin edilib. O, Ağdam, Goranboy, Tovuz, Gədəbəy döyüş bölgələrində aparılan əməliyyatların iştirakçısı olub. Rəfael Əsədov 12 noyabr 1992-ci ildə Ağstafa bölgəsində növbəti əməliyyata hazırlıq zamanı yaxınlıqda partlayan mərmi qəlpələrindən həlak olub.
Elbrus Allahverdiyev və İqor Makeyev Gəncənin, Rəfael Əsədov isə Bakının Şəhidlər xiyabanında torpağa tapşırılıb. Gəncə və Bakıda şəhidlərimizin adlarını daşıyan küçələr var.
