Gəncə Praporşiklər Məktəbi 1 dekabr 1918-ci ildə Gəncə Hərbi Məktəbinin əsasında yaradılıb.
Azərbaycan Xalq Cümhuriyyəti zabit kadrların sayının artırılmasına böyük əhəmiyyət verirdi. Bu səbəbdən general Səməd bəy Mehmandarovun təşəbbüsü ilə Praporşiklər Məktəbi yaradılır. Bu məktəb AXC dövründə milli ordu üçün zabit kadrları hazırlayan ilk hərbi təhsil müəssisəsi idi.
Praporşiklər Məktəbinin məzunu olan şəxs buraxılış imtahanlarını uğurla başa vurduqda dərhal ilk zabit rütbəsinə - praporşik rütbəsinə layiq görülürdü. “Praporşik” çar Rusiyası dövründə ordu və donanmada ən kiçik zabit rütbəsi idi.
24 dekabr 1918-ci ildə polkovnik Şirin bəy Kəsəmənli Gəncə Praporşiklər Məktəbinin rəisi təyin olunur. Lakin 8 aprel 1919-cu ildə Kəsəmənli 2-ci Bakı piyada alayının komandiri təyin olunur və polkovnik Rüstəm bəy Şıxlinski məktəbin rəisi vəzifəsini icra etməyə başlayır.
1919-cu ilin aprel ayında məktəbin ilk buraxılışı olur. Bu səbəbdən Azərbaycan Parlamenti sədrinin müavini Həsən bəy Ağayev və digər rəsmi şəxslər Gəncəyə gəlirlər. İlk buraxılışda məktəbin 135 məzunu zabit rütbəsinə layiq görülür. Məktəbin 1919-cu ilin sentyabr ayında baş tutan ikinci buraxılışında isə oranı 119 nəfər bitirir.
6 sentyabr 1919-cu ildə Praporşiklər Məktəbi Bakıya köçürülür. 1919-cu ilin oktyabrında bu məktəbin bazasında Hərbiyyə məktəbi yaradılır.
Mənbələr:
