1990-cı il yanvarın 19-dan 20-nə keçən gecə SSRİ-nin qoşunları Bakıya və Azərbaycanın bir neçə rayonuna yeridilib, dinc əhalini ağır texnikadan və müxtəlif silahlardan atəşə tutub. Qoşunların qanunsuz yeridilməsi nəticəsində Bakıda və ətraf rayonlarda 131 nəfər öldürülüb, 744 nəfər yaralanıb. Həlak olanların arasında qadınlar, uşaqlar və qocalar, həmçinin təcili yardım və polis işçiləri olub. Qanlı Yanvar hadisələrində şəhid olanlar arasında gəncəli Valeri Boqdanov olub. Gencexeber.az sizə şəhidimiz haqda məlumat hazırlayıb.
Valeri Zakir oğlu Boqdanov 1958-ci ildə Gəncə şəhərində anadan olub.
O, 1975-ci ildə 18 saylı Dəmiryol məktəbini, 1985-ci ildə isə Rostov şəhərindəki Dəmiryol Nəqliyyatı Mühəndisləri İnstitutunu bitirmişdir. Bir müddət dəmiryol nəqliyyatında müxtəlif işlərdə çalışan Valeri çox çəkmir ki, Azərbaycan Respublikası Daxili İşlər Nazirliyinə işə dəvət olunur. O, burada da qısa vaxtda nüfuz qazanır, nümunəvi xidmətə görə ona baş leytenant rütbəsi verilir.
1990-cı il Qanlı Yanvar hadisələri ərəfəsində o, Bakıda idi. Baş leytenant Boqdanov yanvarın 19-dan 20-nə keçən gecə Bakıda operativ tapşırıqla əməliyyat həyata keçirirdi və bütün gecəni yaralılara kömək edirdi. Yanvarın 20-də səhər tezdən Bakının Tbilisi prospektində Boqdanovun maşını atəşə tutulur. İş yoldaşları onu xəstəxanaya çatdırsalar da, Valerini xilas etmək mümkün olmur.
O, Gəncənin Şəhidlər xiyabanında dəfn edilmişdir.
Gəncəli döyüşçü ölümündən sonra “Qırmızı Ulduz” ordeni ilə təltif edilmişdir və “Azərbaycan Respublikasının azadlığı uğrunda mübariz” fəxri adına layiq görülmüşdür.
Mənbələr:
