Mir İbrahim Mir Tağı oğlu Həmzəyev 25 dekabr 1908-ci ildə Gəncə şəhərində anadan olub.
O, Gəncədəki yeni tipli altısinifli məktəbdə oxuyub, 1920-ci ildə Gəncə fəhlə klubunun nəzdindəki dram dərnəyinə üzv olub və buradakı tamaşalarda çıxış edib. 1920-1921-ci illərdə Gəncə hərbi komissarlığında işləyib, lakin dram dərnəyindən ayrılmayıb. Həmzəyev 1921-1925-ci illərdə Gəncə Pedaqoji Texnikumunda təhsil alıb. 1925-1928-ci illərdə Gəncə mərkəzi klubunda direktor işləyib.
1930-cu ildə Mirzə Fətəli Axundov adına Bakı Teatr Məktəbinə daxil olan İbrahim Həmzəyev buranı 1933-cü ildə bitirir. Həmin illərdə Bakı Türk İşçi Teatrının yardımçı heyətinə qəbul edilir. Teatr Gəncəyə köçdükdən sonra o, 1933-cü ildə Gəncə Türk İşçi Teatrının (sonralar Gəncə Dövlət Dram Teatrı) aktyor truppasına daxil olur. 1936-cı ildə Tiflis Dövlət Türk Dram Teatrına birinci kateqoriya aktyor ştatına qəbul olunur, lakin həmin il Tiflisdən qayıdaraq yenidən Gəncə Dövlət Dram Teatrının truppasına qəbul edilir.
Həmzəyev 1937-ci ildə Naxçıvan Dövlət Musiqili Dram teatrının truppasına aktyor götürülüb. O, teatrda direktor, aktyor, baş rejissor vəzifələrində çalışıb. 1947-1948-ci illərin teatr mövsümündə yardım üçün Füzuli Dövlət Dram Teatrına göndərilib.
Həmzəyevin yaradıcılığında 150-dən artıq səhnə obrazı var. Sənətkar “Azərbaycan SSR Xalq artisti” və “Azərbaycan SSR Əməkdar artisti” fəxri adlarına layiq görülüb.
Rejissor musiqili komediya janrında Üzeyir bəy Hacıbəyovun "Arşın mal alan", "Ər və arvad", "Məşədi İbad", Zülfüqar bəy Hacıbəyovun "Evliykən subay", "Əlli yaşında cavan", Süleyman Rüstəm və Səid Rüstəmovun "Durna", Sabit Rəhman və Süleyman Ələsgərovun "Ulduz" əsərlərinə quruluş verib. O, həmçinin tərcümə pyesləri olan "Otello" (Vilyam Şekspir), "Sevilya ulduzu" (Lope de Veqa), "İki ağanın bir nökəri" (Karlo Haldoni) tamaşalarına quruluş verib.
Həmzəyev ictimai həyatda da fəal iştirak edib. O, Naxçıvan vilayət və şəhər partiya komissiyasının üzvü, Naxçıvan şəhər xalq deputatları Sovetinin deputatı seçilmişdir.
İbrahim Həmzəyev 4 fevral 1982-ci ildə Bakıda vəfat edib və Naxçıvanda dəfn olunub.
Mənbələr:
