Atatürk prospekti 92a ünvanında yerləşən Gəncə Şəhər Mərkəzi Stadionu yararsız haldadır. Bu haqda müxbirimiz bu gün xəbər verib.
2018-ci ildə Gəncə şəhər stadionu təmir üçün dövlət proqramına salınıb. Onun yenidənqurma işlərinin 2019-2020-ci illərdə aparılması planlaşdırılsa da, bu günə kimi heç bir iş görülməyib.
Qeyd edək ki, bir vaxtlar Azərbaycanda ən böyük azarkeş kütləsinə sahib olan “Kəpəz” futbol klubu Gəncə Şəhər Mərkəzi Stadionunda ev oyunlarını keçirirdi. Hal-hazırda komanda bəzi məşqlər üçün orada toplanır.
Bu mövzu Facebook sosial şəbəkəsində də müzakirə olunub. Sakinlərin sözlərinə görə “Kəpəz” bir növ Gəncənin simvolu idi. Vaxtıkən oyunu izləmək üçün 20000 azərkeş stadiona üz tuturdu, indi isə gedəsi yerləri yoxdur.
Gəncədə yerləşən digər iki stadionun vəziyyəti də ürək açan deyil. Belə ki, Əziz Əliyev küçəsində yerləşən “Spartak” və Füzuli parkının yanında yerləşən “Metallurq” stadionları istifadəsiz qaldığı üçün yararsız hala düşüb.
Gəncə şəhər mərkəzi stadionu 1964-cü ildə istifadəyə verilib. Stadionun tamaşaçı tutumu 19827 nəfərdir.
“Metallurq” idman kompleksi 1975-ci ildə istifadəyə buraxılıb. Kompleksin 6 hektar ərazisi var.
“Spartak” stadionu 1948-ci ildən istifadəyə verilib. Onun 5,6 hektar sahəsi var.
Azərbaycan Premyer-liqasının 2015/2016-cı il mövsümündə tamaşaçı sayında rekord vuran “Kəpəz” futbol klubunun çempionat ərzində 18 ev oyununu Gəncə şəhər stadionundan 240 min 650 azarkeş izləyib. Bir oyunda iştirak edən ən çox tamaşaçı sayı isə 2016-cı il fevralın 14-də “Kəpəz”–”Qarabağ” görüşündə qeydə alınıb – 20 min 400 tamaşaçı.
