Gəncədə nəzarətçi olmaq istəyənlər üçün təlim keçirilib. Bu haqda 6 fevral tarixində Kəpəz televiziyasına istinadən məlumat veririk.
Təlim Dövlət İmtahan Mərkəzi tərəfindən təşkil olunub. Məqsəd zal nəzarətçisi qismində cəlb edilən namizədlər üçün sertifikasiya imtahanına hazırlıq olub. Dörd saat davam edən təlimdə 126 namizəd iştirak edib.
Burada namizədlərə zal nəzarətçilərinin öhdəlikləri, imtahan vaxtı üzərlərinə düşəcək vəzifələr izah olunub. Texnologiyalar və imtahanın gedişi ilə bağlı qaydalardan danışılıb. Protokolların yazılması, cavab kartlarının doldurulması, paylanması və yığılması qaydalarından bəhs olunub. Dövlət İmtahan Mərkəzi tərəfindən həyata keçirilən yeniliklər barədə məlumatlar verilib. İmtahan zalının peşəkar idarə olunması üçün mühüm məqamlar qeyd edilib, şəxsi anket məlumatlarını dəqiqləşdirmək, nəzarətçi müəllimlərin xüsusi hallarda operativ qərar qəbul etmə qabiliyyətlərini interaktiv üsullarla, sorğu-sualla ortaya çıxarmaq yönündə tövsiyələr verilib.
Bu təlimin sonunda namizədlər zal nəzarətçisi olmaq üçün sertifkasiya imtahanında iştirak edəcəklər.
