Gəncədə məktəblilərə fövqəladə hallar zamanı davranış barədə məşğələlər keçirilib. Bu haqda 23 fevral tarixində Kəpəz televiziyasına istinadən məlumat veririk.
Gəncənin Fizika, Riyaziyyat və İnformatika təmayüllü liseyində “Özünü və başqalarını xilas et” adlı layihəyə yekun vurulub. Proyekt Gəncə və Göygöldən 60 nəfər şagirdi əhatə edib.
Məqsəd şagirdlərin zəlzələ, yanğın və digər gözlənilməz fövqəladə hadisələr haqqında məlumatlılığının artırılması və hazırlıq səviyyəsinin yüksəldilməsi olub. Burada baş vermiş və ya baş verə biləcək fövqəladə hadisələr, xüsusiyyətləri, onlara hazırlıq, mühafizə üsulları, qarşısının alınmasına dair davranış qaydaları və bu hadisələrin fəsadlarını minimuma endirmək kimi məsələlərə toxunulub.
Şagirdlərə fövqəladə hallar, onların təsnifatı və xüsusiyyətləri mövzusunda nəzəri təlim, fövqaladə vəziyyətlərdə psixoloji vəziyyətin qorunmasına dair seminar, mövsümündən asılı olaraq, fövqaladə vəziyyətlərdə necə davranmalı olduqları və ilkin tibbi yardım qaydaları haqqında əyani təlimlər keçirilib. Layihə çərçivəsində 2 infosessiya, 1 infotur və animasiya filmi hazırlanıb, məktəblilərə məlumatlandırıcı bukletlər paylanılıb.
