YAP Gəncə şəhər təşkilatında “Açıq qapı” günlərinə start verilib. Bu haqda 4 fevral tarixində partiyaya istinadən məlumat veririk.
Tədbirdə YAP Gəncə şəhər təşkilatının sədr müavini Nurəddin İbrahimov, Gəncə Şəhər Ağsaqqallar Şurasının sədri Nurəddin Məmmədov, partiya veteranları, gənclər və ictimaiyyət nümayəndələri iştirak ediblər. Məqsəd vətəndaşların arzu və istəklərini öyrənmək, problemləri ilə tanış olmaq, yarana biləcək suallarını operativ cavablandırmaq, onları maraqlandıran məsələləri müzakirə etmək olub.
Görüşdə yaşlı vətəndaşların bilik və təcrübələrini gənclərə ötürülməsi, onlar arasında ünsiyyətin qurulması ilə bağlı məsələlər müzakirə edilib. Burada iştirak edən vətəndaşların fikirləri tək-tək dinlənilib. Mütəmadi olaraq ahıl və tənha insanlarla görüşlərin, onların iştirakı ilə dəyirmi masaların, sərgilərin təşkil edilməsi təklif edilib.
Qeyd edək ki, “açıq qapı” günləri hər ayın ilk həftəsinin çərşənbə günü gənclər, cümə günü isə yaşlı vətəndaşlar üçün təşkil olunur.
