Gəncədə intellektual oyunun seçim mərhələsi baş tutub. Bu haqda 27 fevral tarixində “Xəzər” İntellektual Gənclər Klubuna istinadən məlumat veririk.
Məlumat verdiyimiz kimi, Gənclər Fondunun maliyyə dəstəyi, “Xəzər” İntellektual Gənclər Klubunun təşkilatçılığı və “Gəncə” İntellektual Klubunun birgə tərəfdaşlığı ilə ölkədə növbəti dəfə olaraq “Nə? Harada? Nə zaman?” intellektual oyunu üzrə XII “Çağırış Kuboku” keçiriləcək. Layihənin ilkin olaraq Gəncə seçim turu təşkil olunub.
Burada iki tur olmaqla ümumilikdə 24 sual səsləndirilib. Müsabiqədə 10 komanda finala vəsiqə uğrunda mübarizə aparıb. Gərgin mübarizənin sonunda Gəncə Dövlət Universitetinin tələbələrindən ibarət iki komanda finalda iştirak hüququ qazanıb.
Layihənin keçirilməsində əsas məqsəd Heydər Əliyev siyasətini gənc nəslə aşılamaq, qəhrəmanlarımızın keçdiyi şərəfli yolu intellekt yolu ilə gənclərimizə çatdırmaq, vətənpərvərlik hisslərinin geniş təbliği, ölkənin tarixini, coğrafiyasını, milli-mənəvi dəyərlərini öyrətməkdən ibarətdir.
