Gəncədə sakinləri kommunal problemlər narahat edir. Bu haqda Gencexeber.az-a 24 iyun tarixində məlumat daxil olub.
Söhbət şəhərin 3 və 4-cü mikrorayonlarından gedir. Burada yaşayan sakinlər yağış sularının binaların zirzəmilərinə dolmasından narazıdırlar.
“Yağış yağan kimi bütün su dolur zirzəmilərə. Orada qalır və pis qoxu yaranır. Divarlarımız nəm çəkir, ağcaqanad əlindən bloka girə bilmirik. Kanalizasiya sistemi artıq iki ildir çəkilib, lakin problemimiz həll olunmayıb. Yollarımızda asfalt örtüyü yoxdur. Hər yanda gölməçələr əmələ gəlir. Uşaqların oynaması üçün şərait mövcud deyil”, - deyə onlar qeyd ediblər.
Sakinlər bildirirlər ki, dəfələrlə aidiyyəti qurumlara müraciət ediblər. Lakin məsələlər həllini tapmayıb.
