Gəncə Regional Turizm İdarəsi və Regional Miqrasiya İdarəsinin birgə təşkilatçılığı ilə maarifləndirici təlim olub. Bu haqda 28 iyun tarixində Regional Turizm İdarəsinə istinadən xəbər veririk.
Təlim “Əcnəbilərin və vətəndaşlığı olmayan şəxslərin Azərbaycan Respublikasında yerləşən mehmanxana, sanatoriya, istirahət evi, pansionat, kempinq, turist bazası, xəstəxana və ya digər belə ictimai yerlərdə olduğu yer üzrə qeydiyyat qaydaları” mövzusunda keçirilib. Təlimin keçirilməsində məqsəd qərb bölgəsində yerləşən turizm müəssisələri nümayəndələrinin yuxarıda qeyd edilən qaydalarla bağlı maarifləndirilməsidir.
İclasda Regional Turizm İdarəsinin rəisi Zaur Bayramov, Gəncə Regional Miqrasiya İdarəsinin rəisi Orxan Xıdırov və yerləşmə müəssisələrinin nümayəndələri iştirak ediblər. Burada mövzu ətrafında geniş müzakirələr aparılıb və turizm sənaye subyektlərinin sualları cavablandırılıb.
