Gəncədə sığınacaq ziyarət olunub. Bu haqda 30 dekabr tarixində İcra Hakimiyyətinə istinadən məlumat veririk.
Niyazi Bayramov “TƏMAS” RİİB-nin nəzdində fəaliyyət göstərən "İnsan alveri və insan alverinin potensial qurbanlarına xidmət göstərən regional reabilitasiya reinteqrasiya mərkəzinə (sığınacaq)" baş çəkib. Görüşdə İctimai Birliyin sədri Südabə Məmmədova, sədr müavini Kübra Ələkbərova, iş adamı Qiyas Akkurt və Gəncə Şəhər İcra Hakimiyyəti başçısı Aparatının məsul əməkdaşları iştirak ediblər.
İcra başçısına bildirilib ki, hazırda burada 22 nəfər yaşayır ki, bunlardan 15-i uşaq, 7-si qadındır. 10 uşaq məktəbdə, 5-i isə məktəbəqədər təhsil müəssisəsində təhsil alır. Niyazi Bayramov sığınacağın fəaliyyəti ilə tanış olub, burada yaşayan ailələrin qayğıları ilə maraqlanıb, onların müraciətlərini dinləyib və həlli istiqamətində tapşırıqlar verib. Həmçinin şəhər rəhbəri Dünya Azərbaycanlılarının Həmrəylik Günü münasibətilə sığınacaq sakinlərini təbrik edib.
Daha sonra balacalar üçün Şaxta babanın iştirakı ilə Yeni il bayramı təşkil olunub. İH adından sığınacaq sakinlərinə müxtəlif hədiyyələr təqdim edilib.
Qeyd edək ki, bundan bir gün öncə Regional Mədəniyyət İdarəsi sığınacaqda qalan uşaqlar üçün bayram şənliyi təşkil edib. Burada balacaların əylənməsi üçün müxtəlif personajlar qonaq olublar. Həmçinin uşaqlara hədiyyələr verilib.
