Gəncədə ərazilərdən birində kanalizasiyanın daşması sakinlərin etirazına səbəb olub. Bu haqda Gencexeber.az-a 28 iyun tarixində məlumat daxil olub.
Sözügedən hal Cavadxan qəsəbəsindəki evlərin qarşısında müşahidə edilir. Burada kanalizasiya quyusu daşır. Ətrafda yaşayan sakinlərin sözlərinə görə, axıntıya səbəb küçənin digər tərəfindəki evlərin kanalizasiya xətlərinin bu xəttə qoşulmasıdır. Nəticədə boru həddindən artıq yükləndiyindən daşmağa başlayıb.
“Məsələ ilə bağlı aidiyyəti qurumlara müraciət etmişik, deyiblər, gözləyin, düzəldəcəyik, artıq xeyli vaxtdır vəziyyət belədir. 2-3 il əvvəl həmin küçəyə kanalizasiya xətti çəkilib, amma xətt yarımçıq qalıb”, – deyə sakinlər qeyd ediblər. Vətəndaşlar onu da əlavə ediblər ki, çirkab küçə boyunca axır və xoşagəlməz qoxu əmələ gəlir.
