Gəncədə vətəndaş qəbulu keçirilib. Bu haqda 26 yanvar tarixində Mənzil Kommunal İstehsalat Birliyinə istinadən məlumat veririk.
MKTİB-nin rəisi Nurəhməd Əhmədov sakinlərlə görüşüb. Burada onların kommunal sahə ilə bağlı şikayət və təklifləri dinlənilib. Müraciətlər arasında işlə təminat, ödənişlərlə bağlı yaranan problemlər, yaşayış qeydiyyatından çıxma və daxil olma, dam örtüyünün yenilənməsi, küçə işıqlandırılması, məişət tullantıları üçün nəzərdə tutulan konteynerlərin yaşayış məntəqələrinə yerləşdirilməsi kimi məsələlər üstünlük təşkil edib.
Səsləndirilən şikayət və təkliflərin həll olunması istiqamətində qurumun müvafiq şöbələrinə tapşırıqlar verilib. MKTİB-nin fəaliyyət dairəsinə daxil olmayan məsələlərlə bağlı müraciətlər qeydiyyata alınaraq müvafiq qurumlara göndərilməsi üçün nəzarətə götürülüb. Qəbulda iştirak edən 70 vətəndaşdan 14 nəfərin müraciəti işlə bağlı olduğu üçün MKTİB-nin Ərazi Xidmət Sahələrinə yönləndirilib.
