Gəncədə ictimai nəqliyyatın vəziyyəti sakinlərin narazılığına səbəb olur. Bu haqda 9 fevral tarixində Kəpəz televiziyasına istinadən məlumat veririk.
Şəhərdə 8 daşıyıcı şirkət 32 marşrut xətti üzrə sərnişindaşıma həyata keçirir. Ümumilikdə gündəlik olaraq 300-ə yaxın avtobus xəttə buraxılır. Bu nəqliyyat vasitələrinin hamısı orta və kiçik tutumludur, salonları ya çirkli olur, ya da oturacaqlar və tutacaqlar istifadə üçün yararsız haldadır, əksəriyyəti də istismar müddətini başa vurub.
Bu vəziyyət sakinlərin narazılığına səbəb olur. Səbəbi isə sürücülər sərnişinlərdə, sərnişinlər isə xidmətin aşağı səviyyəsində görürlər.
Azərbaycan Yerüstü Nəqliyyat Agentliyinin Gəncə Regional İdarəsinin müdirinin sözlərinə görə, bununla bağlı müəyyən danışıqlar aparılır:
“AYNA tərəfindən daşıyıcılarla görüşülüb və avtobusların mərhələli şəkildə dəyişdirilməsi gündəmdədir. Hər 3 aydan bir bir qisim dəyişdiriləcək. İl sonuna kimi yeni avtobusların dəyişdirilməsi təmin olunacaq”.
