Gəncədə avtoxuliqanlıq edən şəxs saxlanılıb. Bu haqda 16 yanvar tarixində “Avtosfer”ə istinadən məlumat veririk.
Gəncə şəhər Baş Polis İdarəsinin Dövlət Yol Polisi Şöbəsinin (ŞBPİ DYPŞ) əməkdaşları tədbir keçiriblər. Nəticədə “LADA” markalı avtomobil ilə yollarda intizamsızlıq edərək yol hərəkəti qaydalarını pozan, avtoxuliqanlıq edən şəhər sakini Şahin Məmmədov saxlanılıb.
Məlum olub ki, o, qanun pozuntularını narkotik vasitənin təsiri altında törədib. Dəfələrlə analoji əməllər törətməsinə görə inzibati tənbeh tədbiri görülən Məmmədov barəsində protokol tərtib olunaraq məhkəməyə göndərilib. Məhkəmənin qərarı ilə o, 25 gün müddətinə inzibati qaydada həbs olunub.
Qeyd edək ki, Şahin Məmmədov sosial şəbəkələrdə özünü "Şıkı" kimi təqdim edərək mütəmadi olaraq avtoxuliqanlıq edib.
