Bu gün şəhid İlham Əhmədov və Elşən Abdullayevin doğum günüdür.
İlham Təhməz oğlu Əhmədov 1 avqust 1972-ci ildə Gəncədə anadan olub. Orta təhsilini 20 saylı məktəbdə alıb. 1990-cı ildə sürücülük sənətinə yiyələnib.
O, 10 oktyabr 1990-cı ildə Kəpəz Rayon Hərbi Komissarlığı tərəfindən həqiqi hərbi xidmətə çağırılıb. 25032 saylı hərbi hissənin tərkibində Tərtər, Ağdərə, Füzuli bölgələrində vuruşub.
İlham Təhməz oğlu Əhmədov 18 yanvar 1994-cü ildə düşmən gülləsinə tuş gələrək şəhidlik zirvəsinə ucalıb. O, Gəncə Şəhidlər xiyabanında dəfn olunub. Oxuduğu məktəbdə mərhumun xatirə şəkli vurulub.
Elşən Sabir oğlu Abdullayev 1 avqust 1992-ci ildə Gəncədə doğulub. 2009-cu ildə 5 nömrəli tam orta məktəbi bitirib. 2010-2014-cü illərdə Gəncə Dövlət Universitetinin “Bədən tərbiyəsi və idman müəllimliyi” ixtisası üzrə təhsil alıb.
2014-cü ildə həqiqi hərbi xidmətə çağırılıb. Həmin ilin noyabr ayında Silahlı Qüvvələrin Təlim-Tədris mərkəzinin zabit kursuna daxil olub. 2015-ci ilin fevralında buranı bitirib və leytenant rütbəsi alıb.
2019-cu ildə ona baş leytenant rütbəsi verilib. 23 oktyabr 2020-ci ildə ailəsinə xəbər vermədən Xüsusi Təyinatlı Qoşunların tərkibinə daxil olub, 24 oktyabrda döyüş bölgəsinə yollanıb. Elşən Sabir oğlu Abdullayev 9 noyabr 2020-ci ildə Şuşa-Xankəndi yolu istiqamətində gedən döyüşlərdə şəhidlik zirvəsinə yüksəlib.
12 noyabr 2020-ci il tarixində Gəncə şəhərinin Şəhidlər xiyabanında dəfn edilib.
Şəhidimiz Prezident tərəfindən “Vətən uğrunda”, “Döyüşdə fərqlənməyə görə”, “Şuşanın azad olunmasına görə” və “Kəlbəcərin azad olunmasına görə” medalları ilə təltif olunub.
