Bu gün şəhid Bəhlul Allahmanovun, Zakir Niyazovun və İsa Abbasovun doğum günüdür.
Bəhlul Mustafa oğlu Allahmanov 2 avqust 1960-cı ildə Gəncədə anadan olub. 28 saylı orta məktəbi bitirib. 1989-cu ilin sonlarında Ağcakənddə ermənilər paylayıcı stansiyanı sıradan çıxardığına görə Gəncə elektrik şəbəkəsinin bir qrup işçisi bərpa işləri aparmaq üçün həmin rayona ezam edilib. Ermənilər təmir işləri aparan energetikləri girov götürüb və 13 gün işgəncə veriblər. Onların arasında Bəhlulun atası da olub. Bəhlul atasının qisasını almaq üçün döyüşə yollanıb. O, Ağcakəndin, Ağdərənin və bir sıra digər yerlərin ermənilərdən təmizlənməsində iştirak edib.
2 iyul 1992-ci ildə Armud postu yaxınlığında gedən qızğın döyüş zamanı ağır yaralanıb. Bəhlul Mustafa oğlu Allahmanov 7 avqust 1992-ci ildə şəhidlik zirvəsinə ucalıb.
Zakir Fikrət oğlu Niyazov 2 avqust 1970-ci ildə Gəncədə anadan olub. O, Gəncə şəhəri 32 saylı orta məktəbin 8-ci sinfini bitirdikdən sonra Avtomexanika Texnikumuna daxil olub və avtomobil istismarı peşəsinə yiyələnib. 1989-1991-ci illərdə Omsk şəhərində Daxili Qoşunlarda qulluq edib.
20 mart 1993-cü ildə Nizami Rayon Hərbi Komissarlığı tərəfindən səfərbərliyə alınıb, Gəncə batalyonunun tərkibində Naxçıvanik, Drambon döyüşlərində iştirak edib. Zakir Fikrət oğlu Niyazov 2 aprel 1993-cü ildə Ağdərə uğrunda gedən döyüşlərdə şəhidlik zirvəsinə yüksəlib.
İsa Faiq oğlu Abbasov 2 avqust 1996-cı ildə Gəncədə doğulub. 2014-cü ildə 20 nömrəli tam orta məktəbi bitirib. 2014-2018-ci illərdə Gəncə Dövlət Universitetinin Tarix müəllimliyi ixtisasında təhsil alıb.
2018-ci ildə həqiqi hərbi xidmətə çağırılıb. 28 sentyabr 2020-ci ildə səfərbərlik zamanı yenidən ordu sıralarına qatılıb. Füzuli, Xocavənd rayonları və Şuşa şəhəri uğrunda gedən döyüşlərdə iştirak edib.
İsa Faiq oğlu Abbasov 9 noyabr 2020-ci ildə Şuşa şəhəri uğrunda gedən döyüşlərdə şəhidlik zirvəsinə ucalıb. Şəhidimiz Prezident tərəfindən “Vətən uğrunda”, “Cəsur döyüşçü” və “Şuşanın azad olunmasına görə” medalları ilə təltif olunub.
