Bu gün şəhid Vaqif Əliyev və Vüsal Məmmədovun doğum günüdür.
Vaqif Vahid oğlu Əliyev 3 avqust 1978-ci ildə Tərtər rayonunda anadan olub. O, 25 saylı orta məktəbin 4-cü sinfini bitirdikdən sonra təhsilini 12 saylı orta məktəbdə davam etdirsə də, tam başa vurmayıb. 1993-cü ildə, 15 yaşında könüllü olaraq, 709 saylı hərbi hissənin tərkibinə yazılıb. Ağdam, Kəlbəcər, Murovdağ uğrunda gedən döyüşlərdə iştirak edib.
6 iyul 1993-cü ildə Vaqif Vahid oğlu Əliyev Ağdam rayonunun Şelli kəndi uğrunda gedən döyüşlərdə şəhidlik zirvəsinə ucalıb. Gəncə şəhərinə gətirilərək Şəhidlər xiyabanında dəfn edilib.
Vüsal Elşən oğlu Məmmədov 3 avqust 1998-ci ildə Gəncədə doğulub. 22 nömrəli tam orta məktəbi bitirib. 2016-cı ildə həqiqi hərbi xidmətə çağırılıb. Qayıtdıqdan sonra fotoqraf kimi fəaliyyət göstərib.
28 sentyabr 2020-ci ildə səfərbərlik zamanı yenidən ordu sıralarına qatılıb. O, Xüsusi Təyinatlı qrupun tərkibində vuruşaraq, Füzuli və Xocavənd rayonları, həmçinin İlandağ yüksəkliyi uğrunda gedən döyüşlərdə yer alıb. Vüsal Elşən oğlu Məmmədov 9 noyabr 2020-ci il tarixində Xocavənd rayonu istiqamətində gedən döyüşlərdə şəhidlik zirvəsinə yüksəlib.
18 mart 2021-ci il tarixində Gəncə şəhərinin Şəhidlər xiyabanında dəfn edilib.
