Bu gün şəhid Həsən Abdullayevin doğum günüdür.
Həsən Qərib oğlu Abdullayev 21 iyun 1994-cü ildə Daşkəsən rayonunda anadan olub. 2001-2011-ci illərdə Daşkəsən rayon S.Vurğun adına 4 nömrəli tam orta məktəbdə təhsil alıb. 2012-ci ildə həqiqi hərbi xidmətə yollanıb.
Həqiqi hərbi xidmətdən qayıtdıqdan sonra idmanın karate-do növü ilə məşğul olub, bir sıra nailiyyətlər əldə edib. 8 sentyabr 2020-ci il tarixindən MAXE hərbi qulluqçu kimi fəaliyyətə başlayıb. Daha sonra isə könüllü olaraq Xüsusi Təyinatlı Qüvvələrdə xidmətini davam etdirib.
Vətən müharibəsi zamanı o, ölkəmizin ərazi bütövlüyü uğrunda vuruşub. Həsən Qərib oğlu Abdullayev 6 noyabr 2020-ci ildə Şuşa şəhərinin Daşaltı kəndi uğrunda gedən döyüşlərdə şəhidlik zirvəsinə yüksəlib. O, Gəncə şəhər Şəhidlər xiyabanında dəfn olunub.
Şəhidimiz ölümündən sonra “Vətən uğrunda”, “Döyüşdə fərqlənməyə görə”, “Kəlbəcərin azad olunmasına görə” və “Şuşanın azad olunmasına görə” medalları ilə təltif edilib.
