Gəncədə şəhid Asim Süleymanovun doğum günü keçirilib. Bu haqda Gencexeber.az-a 18 fevral tarixində məlumat daxil olub.
Gəncə şəhəri Şəhidlər xiyabanında Asimin məzarı ziyarət olunub. Tədbirdə onun ailəsi, yaxınları, dostları, tanışları və şəhər sakinləri iştirak ediblər. Ruhuna dualar oxunub və qəbri önünə gül dəstələri düzülüb.
Asim Məhərrəm oğlu Süleymanov 18 fevral 2001-ci ildə Daşkəsən rayonunun Xoşbulaq kəndində anadan olub. 2018-ci ildə Gəncə şəhər 21 nömrəli tam orta məktəbi bitirib. Daha sonra Gəncə Dövlət Regional Kollecinə “Vaqon və refrijerator təsərrüfatı” ixtisası üzrə daxil olub.
2019-cu ildə həqiqi hərbi xidmətə çağırılıb. Vətən müharibəsi zamanı Tərtər rayonunun Suqovuşan kəndi, Xocavənd rayonunun Ağoğlan (Hadrut) qəsəbəsi, Cəbrayıl və Xocavənd rayonlarının azadlığı uğrunda vuruşub. Asim Məhərrəm oğlu Süleymanov 4 noyabr Xocavənd rayonu uğrunda gedən döyüşlərdə şəhidlik zirvəsinə ucalıb və bir gün sonra Gəncə şəhərinin Şəhidlər xiyabanında dəfn olunub.
