Nizami yurdunun abadlaşdırılması işləri davam etdirilir. Bu haqda 14 fevral tarixində Gəncə şəhər Kommunal Təsərrüfatı İstehsalat Birliyinin Yaşıllaşdırma İdarəsinə istinadən xəbər veririk.
Şöbənin Gülçülük sahəsində yerləşən istixanalarda yetişdirilən yaz güllərinin qablaşdırılma prosesi aparılır. Toxumdan əldə olunan şitillər kök verəndən sonra torf qarışıq münbit torpaqlı qablara əkilir. Güllərin istixanada qablaşdırma prosesi təxminən 5-6 gün davam edəcək.
Bundan sonra istixanada aqrotexniki qulluq göstərilən bitkilər qışın sərt soyuğundan qorunduqdan sonra fevral ayının sonu, mart ayının əvvəlində şəhərin müxtəlif ərazilərində təyin olunan yerlərə köçürüləcək.
Qeyd edək ki, təsərrüfatın 10 sot ərazisində yerləşən bu istixanada hazırda 60 min gül şitilinin qablaşdırılma işləri görülüb. Bu bitkilərdən 50 mini primula, qalanı isə viola, sxizantus, arenaria və kalseolyariya gülləridir. Hazırda bu güllərin bir qisminin şəhərin müxtəlif ərazilərinə əkilməsi prosesi aparılır. İlkin olaraq Şah İsmayıl Xətai prospektində yerləşən Dəyirman dairəsinə 6 min ədəd bənövşənin bir növü olan viola gülləri əkilib. Gülçülük sahəsində isə hazırda geran və petunya güllərinin 20 min ədəd şitili kasetlərdən iri qablara köçürülür. Bundan əlavə, Gülçülük təsərrüfatının istixanalarında ehtiyatda 70 min bequnya və 10 min ədəd kataranya gülləri var ki, onlar da bir müddətdən sonra Gəncənin park və xiyabanlarını, küçə və prospektlərini bəzəyəcək.
