Gəncədə avtoşluq edən şəxslər saxlanılıblar. Bu haqda 7 fevral tarixində Bizim.media-ya istinadən məlumat veririk.
Yol Polisi Şöbəsinin əməkdaşları şəhər ərazisində toy karvanında avtoxuliqanlıq edərək ictimai asayişi nümayişkaranə şəkildə pozan və vətəndaşların narazılığına səbəb olan sürücünü saxlayıblar. Elcan Cəfərov adlı şəxsin “VAZ” markalı avtomobili ilə toy karvanında dövlət qeydiyyat nişanını gizlədərək yollarda intizamsızlıq etdiyi, yol hərəkəti qaydalarını pozaraq avtoxuliqanlıq etdiyi, digər hərəkət iştirakçılarına təhlükə yaratdığı və həmin hərəkətləri sosial şəbəkələrdə paylaşdığı məlum olub. O, məsuliyyətə cəlb edilib.
Bundan başqa bir neçə gəncin müxtəlif markalı avtomobillərlə konstruksiya dəyişikliyi edərək təhlükəli manevrlər etməsi də məlum olub. Onlar saxlanılaraq barələrində qanunamüvafiq tədbir görülüb. Sürücülərlə profilaktik söhbətlər aparılıb. Qanunsuz dəyişikliklər aradan qaldırıldıqdan sonra nəqliyyat vasitələri istismara buraxılıb.
