Gəncədə şəhid ailəsi ilə görüş keçirilib. Bu haqda 28 yanvar tarixində Gəncə Heydər Əliyev mərkəzi və park kompleksi məlumat paylaşıb.
“Qəlbimizin zirvəsində yaşayan qəhrəman” adlı onlayn tədbir 16 nömrəli kitabxana filialı tərəfindən təşkil olunub. Görüş şəhid Rüfət Mustafayevə həsr olunub. Burada şəhidin ailə üzvləri, qohumları və yaxınları, digər şəhid ailələri, Türkmən ədəbiyyatı Yazarlar birliyinin üzvü şairə Esmira Günəş, Gəncə Regional Mədəniyyət İdarəsinin tabeliyində fəaliyyət göstərən müəssisələrin əməkdaşları, 2, 27 nömrəli tam orta məktəblərin şagirdləri, 20 nömrəli tam orta məktəbin sinif müəllimi, Rüfət Mustafayevin sinif yoldaşı Rəvanə İbrahimova iştirak ediblər.
Tədbirin əvvəlində şəhidin qəhrəmanlığı haqda məlumat verilib. Şairə Esmira Günəş Rüfət Mustafayevin əziz xatirəsinə həsr etdiyi ”Qəlbimizin zirvəsində yaşayan qəhrəman” kitabları haqda danışıb. O, öz şeirlərini səsləndirib. Daha sonra şəhidin sinif yoldaşı Rəvanə İbrahimova onunla bağlı məktəb xatirələrini bölüşüb. Xanım qeyd edib ki, müəllim kimi çalışdığı məktəbdə sinif otaqlarından biri Rüfətin adını daşıyır.
Bundan başqa tədbirdə şəhid Bilal Qənbərovun bacısı Aidə Kərimova, Abdulla Əhmədovun anası Validə Əhmədova və Saleh Nuriyevin anası Rəmziyə Nuriyeva çıxış ediblər.
