Gəncənin içməli su təchizatı və kanalizasiya sistemlərinin yenidən qurulması layihəsinin icrası davam etdirilir. Bu haqda 13 iyun tarixində Azərsu-ya istinadən məlumat veririk.
Yeni su və kanalizasiya sistemlərinin 50%-lik hissəsi artıq hazırdır. Bu il üçün nəzərdə tutulan hissənin tikintisi sürətlə aparılır. Bu ilin sonuna kimi işlər tam başa çatdıqdan sonra yeni şəbəkəyə təxminən 1900-dən artıq abonentin qoşulması təmin olunacaq.
Bu il ümumilikdə 16 km uzunluğunda içməli su, 18 km uzunluğunda kanalizasiya xətlərinin çəkilməsi nəzərdə tutulur. Bundan əlavə, Samux rayonu ərazisində tikintisi nəzərdə tutulan çırkab suların təmizlənməsi qurğusuna qədər yeni kollektor xətti də bu il çəkiləcək.
Gəncənin 2035-ci ilədək perspektiv inkişafı nəzərə alınmaqla hazırlanan layihə 450 min nəfərin su təchizatı və kanalizasiya xidmətlərindən istifadəsinin yaxşılaşdırılmasına hesablanıb. Layihə Göygöl rayonunun Murovdağ qəsəbəsini, Hacıməlik və Mollacəlilli kəndlərini əhatə edəcək. Şəhərə su Göygöl, Qızılqaya mənbələrindən və Şəmkirçay su anbarından çəkiləcək.
