Gəncədə avtoxuliqanlıq edən şəxs saxlanılıb. Bu haqda 29 yanvar tarixində Real televiziyasına istinadən məlumat veririk.
Polis əməkdaşlarının apardıqları əməliyyatlar nəticəsində şəhər sakini İlham Nəbiyev saxlanılıb. O, şəhərin Hacıkənd qəsəbəsində "VAZ 2107" markalı avtomobillə qarlı havada təhlükəli manevrlər edərək qəza vəziyyəti yaradıb. Bundan başqa sürücü etdiyi avtoxuliqanlığı videoya çəkərək sosial şəbəkələrdə paylaşıb. Vətəndaş barəsində protokol tərtib olunub və o cərimələnib.
Yol Polis idarəsinin əməkdaşları şəhər ərazisində reydlər də keçirib. Nəticədə ayrı-ayrı ərazilərdə nəqliyyat vasitələrində konstruksiya dəyişikliyi edən sürücülər saxlanılıb. Onların avtomobilləri cərimə meydançasına aparılıb, özləri isə inzibati məsuliyyətə cəlb olunublar.
