Bu gün şəhid İbrahim Məmmədov və Əhməd Hüseynovun doğum günüdür.
İbrahim Azər oğlu Məmmədov 25 fevral 2000-ci ildə Gəncədə anadan olub. 2018-ci ildə İ.Qayıbov adına 1 nömrəli tam orta məktəbin 9-cu sinfini bitirib. Həmin ildə həqiqi hərbi xidmətə çağırılıb.
Vətən müharibəsi zamanı o, yenidən ordu sıralarına cəlb olunub. Burada Füzuli və Zəngilan rayonları istiqamətində gedən döyüşlərdə iştirak edib. İbrahim Azər oğlu Məmmədov 9 noyabr 2020-ci il tarixində Şuşa yaxınlığında gedən döyüşlərdə şəhidlik zirvəsinə ucalıb. 14 noyabr 2020-ci ildə Gəncə şəhərinin Şəhidlər xiyabanında dəfn olunub.
Əhməd Vəli oğlu Hüseynov 25 fevral 1938-ci ildə Goranboy rayonunun Bəşirabad kəndində anadan olub. O, 1953-cü ildə həqiqi hərbi xidmətə çağırılıb. Əsgərlikdən qayıtdıqdan sonra Gəncə şəhər Gil-Torpaq İstehsalat Birliyində çilingər işləməyə başlayıb. Bu vaxt Azərbaycan Politexnik İnstitutunda təhsilini davam etdirərək mühəndis diplomu alıb. Bundan sonra o, işlədiyi müəssisədə «Quru xammalın üyüdülməsi» sexində rəis müavini, Əlvan Metalların Emalı zavodunda sex rəisi kimi yüksək vəzifələrdə çalışıb.
I Qarabağ müharibəsi zamanı könüllü olaraq cəbhəyə yollanıb. Əhməd Vəli oğlu Hüseynov Ağdam rayonunun müdafiəsi uğrunda gedən qanlı döyüşdə şəhidlik zirvəsinə ucalıb və Gəncə şəhəri Şəhidlər xiyabanında dəfn olunub.
