Bu gün şəhidlər Zakir Məmmədov, Rafiq Dəmirov və Əsgər Mərdanovun doğum günüdür.
Zakir Əlirza oğlu Məmmədov 12 noyabr 1958-ci il tarixində Gəncədə anadan olub. 38 saylı orta məktəbi bitirib. Daha sonra 15 saylı texniki-peşə məktəbində təhsil alıb.
1978-ci ildə Minskdə həqiqi hərbi xidmətdə olub. Qayıtdıqdan sonra 10 il müddətində Gəncə Toxuculuq kombinatında mühəndis işləyib. Dəfələrlə müəssisənin rəhbərliyi tərəfindən yüksək mükafatlara layiq görülüb.
1992-ci ildə səfərbərliyə alınıb. “Goran” poliqonunda təlim keçib, sonra Hacıkəndə göndərilib. “Gülüstan” əməliyyatında Erçəç, Mənəş, Buzluq, Başkənd, Gülüstan kəndlərinin azad olunmasında və Laçın rayonunun Büloylu, Əliqulu, Pircahan kəndləri uğrunda gedən döyüşlərdə iştirak edib.
O, 21 iyul 1992-ci ildə Ağdərənin Levonarx kəndində 32 nəfərlə birgə mühasirəyə düşsə də, fövqəladə mərdlik göstərərək xilas olunub. Qəhrəmanlığına görə hərbi hissənin Fəxri Fərmanına layiq görülüb.
Zakir Əlirza oğlu Məmmədov 4 sentyabr 1993-cü ildə Gülüstan kəndi uğrunda gedən döyüşlərdə şəhidlik zirvəsinə ucalıb.
İki gün sonra şəhidimiz Gəncə Şəhidlər xiyabanında dəfn olunub. Oxuduğu məktəbdə onun şərəfinə xatirə bulağı düzəldilib. Zakirin döyüş fəaliyyəti ilə bağlı “Gəncənin səsi” qəzetində “Ölüm sevinməsin” adlı məqalə dərc edilib.
Rafiq Dəmir oğlu Dəmirov 12 noyabr 1966-cı ildə Gəncədə anadan olub. 44 saylı orta məktəbin 8-ci sinfini bitirib. Sonra 38 saylı orta texniki-peşə təhsilli məktəbdə oxuyub. Ali təhsil almaq üçün Xarkov şəhərinə gedib. Lakin 1992-ci ilin fevral ayında Xocalı faciəsindən xəbər tutub və Vətənə qayıdıb. O, könüllü olaraq döyüşə yollanıb.
Laçın, Turşsu, Güləbird, Şuşanın Kosalar və Nəbilər bölgələrində, Cəbrayıl və Hadrut rayonunun Sur və Şaqah yüksəkliklərində döyüşüb. O, pulemyotçu olub.
Rafiq Dəmir oğlu Dəmirov 30 iyun 1992-ci ildə Cəbrayıl rayonunun Sur kəndi yaxınlığında minaya düşərək şəhidlik zirvəsinə ucalıb.
Əsgər İslam oğlu Mərdanov 12 noyabr 1986-cı ildə Qərbi Azərbaycanın Böyük Ayrım kəndində anadan olub. 1987-ci ildə valideynləri ilə birlikdə Gəncəyə gəlib. 24 saylı orta məktəbi bitirib. Azərbaycan Kənd Təsərrüfatı Akademiyasının Yerquruluşu və torpaq müfəttişliyi ixtisasında təhsil alıb.
O, 15 iyul 2008-ci ildə həqiqi hərbi xidmətə çağırılıb. Füzuli rayonunun Əbdülrəhmanlı kəndində xidmət etməyə başlayıb.
Əsgər İslam oğlu Mərdanov 19 fevral 2009-cu ildə şəhidlik zirvəsinə ucalıb. Bir gün sonra isə Gəncə Şəhidlər xiyabanında dəfn olunub.
