İbrahim Həsən oğlu Cəfərov 20 yanvar 1956-cı ildə Naxçıvan Muxtar Respublikası Şərur rayonu Düdəngə kəndində anadan olub.
O, 1979-cu ildə Azərbaycan Kənd Təsərrüfatı İnstitutunda (indiki Azərbaycan Dövlət Aqrar Universiteti (ADAU) dinləyici olaraq, 1980-1985-ci illərdə isə həmin institutun “Bitki mühafizəsi” fakültəsində təhsil alıb. İbrahim Cəfərov 1985-1988-ci illərdə K.A.Timiryazev adına Moskva Kənd Təsərrüfatı Akademiyasında "Fitopatologiya" kafedrasının aspirantı olub. 13 fevral 1989-cu ildə isə ona kənd təsərrüfatı elmləri namizədi elmi dərəcəsi verilib.
Cəfərov 1993-cü ildən 2002-ci ilədək Meyvə-tərəvəzçilik və üzümçülük fakültəsinin, sonra isə Aqronomluq və torpaqşünaslıq fakültəsinin dekanı işləyib. 16 iyun 2006-cı ildə İbrahim Cəfərova kənd təsərrüfatı elmləri doktoru elmi dərəcəsi verilib.
İbrahim Cəfərov 3 dərslik, 1 dərs vəsaiti, 100-dən artıq elmi məqalə, 4 metodiki tövsiyə, fənn proqramları və metodik göstərişlərin müəllifidir.
O, 2000-ci ildən Gəncə şəhərində əvvəlcə 39, sonra 38 saylı Dairə Seçki Komissiyasının sədri vəzifəsində işləyib. Cəfərov 2008-ci ildə Azərbaycan Elmi-Tədqiqat Əkinçilik İnstitutunun nəzdində fəaliyyət göstərən Müdafiə Şurasının həmsədri və sədri olub.
O, ADAU-nun rektor əvəzi, tədris işləri üzrə prorektoru vəzifələrində çalışıb, 25 iyul 2013-cü ildə həmin universitetin rektoru vəzifəsinə təyin olunub.
O, 2016-cı ildə Qazaxıstan Milli Aqrar Universitetinin fəxri professoru adına layiq görülüb. İbrahim Cəfərov 7 noyabr 2016-cı ildə Kənd təsərrüfatının inkişafında xidmətlərinə və dövlət qulluğunda fəaliyyətinə görə 3-cü dərəcəli "Vətənə xidmətə görə" ordeni ilə təltif edilib.
