Bu gün 3 şəhidimizin doğum günüdür.
Asəf Ağası oğlu Məmmədov 12 avqust 1955-ci ildə Gəncədə anadan olub, 39 saylı orta məktəbi bitirib. 1973-75-ci illərdə Ukraynada hərbi xidmətdə olub. Daha sonra çilingər və sürücü işləyib, ailə həyatı qurub.
O, iyulun 25-i 1992-ci ildə səfərbərliyə alınıb. İlk döyüş yoluna Cəbrayıldan başlayıb. Bölük komandiri kimi xidmət edib.
Avqustun 15-də Asəf Məmmədov Şiştəpə uğrunda 8 saata qədər davam edən döyüşdə xeyli düşmən məhv edib. Döyüşün sonuna yaxın Asəf ayağından yaralanıb. Son anda o, iki quldurla üz-üzə gəlib. Onların birini öldürüb. Digəri ilə olan döyüşdə isə həlak olub.
Asəf Ağası oğlu Məmmədov 1992-ci ildə Şiştəpə uğrunda gedən döyüşlərdə şəhidlik zirvəsinə yüksəlib.
İlham Məcid oğlu Məmmədov avqustun 12-də 1969-cu ildə Gəncədə anadan olub, 39 saylı məktəbi bitirib. Ali təhsilini 1986-cı ildə Texnologiya İnstitutunda alıb. Leninqradda hərbi xidmətdə olarkən radiasiya və kimyəvi kəşfiyyat tağımında baş kimyaçı vəzifəsində xidmət edib. Alüminium zavodunda işləyib. Yanvarın 6-da könüllü olaraq, Milli Ordu sıralarına yazılıb. Ağdərə döyüşlərində fəal iştirak edib.
İlham Məcid oğlu Məmmədov martın 6-sı 1993-cü ildə Metişen kəndinin müdafiəsi uğrunda gedən döyüşdə şəhidlik zirvəsinə yüksəlib.
39 saylı məktəbdə, Texnologiya Universitetində və Alüminium zavodundakı şəhidlərin xatirə guşəsində İlham Məmmədov üçün xüsusi yer ayrılıb. Yaşadığı binanın qarşısında «Yadigar bulağı» tikilib. Bulağın yanındakı kiçik torpaq sahəsində 24 qızıl gül kolu əkilib. Bu, İlhamın 24 yaşında vəfatına işarədir.
Anar Qəhrəman oğlu Məmmədov 12 avqust 1995-ci ildə Gəncə şəhərində doğulub, 6 nömrəli tam orta məktəbi bitirib.
2013-2017-ci illərdə Azərbaycan Dövlət Aqrar Universitetində oxuyub. 2017-2019-cu illərdə ADAU-da “Vergi və vergiqoyma” ixtisası üzrə təhsil alıb. 2019-cu ildə hərbi xidmətdə olub.
Anar Məmmədov 2020-ci ildə Vətən müharibəsi döyüşlərinə qatılıb. O, Tərtər rayonunun Suqovuşan kəndi, Füzuli və Cəbrayıl rayonlarının, Daşaltı kəndinin və Şuşa şəhərinin azad olunması uğrunda döyüşlərdə iştirak edib.
Anar Qəhrəman oğlu Məmmədov 9 noyabr 2020-ci il tarixində Xankəndi şəhəri istiqamətində gedən döyüşlərdə şəhidlik zirvəsinə yüksəlib.
Şəhidimiz 17 noyabr 2020-ci ildə Gəncə şəhərinin Şəhidlər xiyabanında dəfn olunub. Prezidentimiz tərəfindən “Vətən uğrunda”, “Cəsur döyüşçü”, “Şuşanın azad olunmasına görə” medalları ilə təltif olunub.
