Gəncədə küçələrin işıqlandırılması prosesi gedir. Bu haqda 7 iyun tarixində MKTİB-yə istinadən məlumat veririk.
MKTİB-nin Küçə İşıqlandırılması şöbəsi tərəfindən şəhər ərazisində köhnə plafonlar daha müasir və qənaətli, işıqlandırma sahəsi daha geniş olan yeni LED lampaları ilə əvəzlənir. Bununla paralel olaraq, ehtiyac olan küçə və prospektlərdə yeni dirəklər basdırılır, müasir gecə işıqlandırma sistemi qurulur. Hazırda adıçəkilən işlər şəhərin İsrafil Məmmədov, Fətəli xan Xoyski, Nəriman Nərimanov, Əziz Əliyev və digər küçələrində aparılıb.
Bundan başqa, Ordubadi, 28 May, Şahsevənlər və Sidqi Ruhulla küçələrində, Atatürk prospektində, İstiqlal parkında və Uşaq Yaradıcılıq Mərkəzinin ətrafında olan paylayıcı şkaflarda saat mexanizmləri yenisi ilə əvəz olunub. Şah ismayıl Xətai prospektində 30, Fizuli parkında 8, Avtozavod ərazisində 41, Heydər Əliyev prospektində isə 8 ədəd küçə işıqları LED isıqlandırıcı ilə əvəzlənib.
Qeyd edək ki, sözügedən şöbə tərəfindən il başlayandan şəhər ərazisində təchiz edilmiş avadanlıqla birlikdə 83 ədəd yeni işıq dayağı quraşdırılıb. Qəza səbəbindən zərər çəkmiş 12 ədəd işıq dayağının isə təmiri və yerinə bərpası təmin edilib.
