Gəncədəki universitetlərin birinin rəhbər heyəti Türkiyəyə səfər edib. Bu haqda 26 oktyabr tarixində ADAU-ya istinadən xəbər veririk.
Azərbaycan Dövlət Aqrar Universiteti və Ege Universitetinin birgə həyata keçirdikləri beynəlxalq ikili diplom proqramının rəhbər komitəsi Ege Universitetində olub. Səfərdə İzmir şəhərindəki universitetin rektoru Necdet Budakın iştirakı ilə ikili diplom proqramı çərçivəsində iclas keçirilib. Burada həyata keçiriləcək layihələr, müəllim-tələbə mübadiləsi və digər məsələlər müzakirə olunub.
Görüşdə ADAU-nun rektoru Zəfər Qurbanov, Kənd Təsərrüfatı Nazirliyinin Elm, təhsil və insan resursları şöbəsinin müdiri İlham Süleymanov, Elm və təhsil nazirinin müşaviri Nicat Məmmədli, KTN-nin Elm, təhsil və insan resursları şöbəsinin müdir müavini Emin Əliyev, Dövlət Proqramı İdarəetmə Qrupunun rəhbəri Turan Topalova, Elm və Təhsil Nazirliyinin Ali və orta ixtisas təhsili şöbəsinin baş məsləhətçisi Vüsalə Qurbanova, ADAU-nun tədris işləri üzrə prorektoru Əhməd Məlikov və ikili diplom proqramının direktoru Lamiyə Quliyeva iştirak ediblər.
