Gəncədəki universitetlərdən birinin əməkdaşları Türkiyənin Ege Universitetinə ezam olunublar. Bu haqda 14 noyabr tarixində ADAU-ya istinadən xəbər veririk.
Azərbaycan Dövlət Aqrar Universitetinin İnformasiya texnologiyaları kafedrasının nümayəndələri Sima Məmmədova və Ləman Kərimli Türkiyənin Ege Universitetinə səfər ediblər. Otuz gün davam edəcək ezamiyyət “Village” Qlobal Mühəndislik Təhsili üçün Virtual İnnovativ Tədris Laboratoriyaları layihəsi çərçivəsində baş tutur.
Layihə mühəndislik fənlərini tədris edən müəllim və tələbələrin pandemiyadan sonrakı təhsil proseslərini, laboratoriya ehtiyaclarını multidisiplinar və çox ölçülü mədəni kontekstdə yenidən nəzərdən keçirəcək. Həmçinin tələblərə uyğun olaraq, yeni tədris modelləri üçün yol xəritələrini müəyyənləşdirəcək. Bu modeli sınaqdan keçirmək üçün pilot virtual laboratoriya və təlim materialları hazırlanacaq, effektiv və davamlı tədris modelləri yaradılacaq.
Qeyd edək ki, layihə hər iki universitetin qrant əldə etdiyi Avropa Komissiyası tərəfindən “Horizon Avropa” Tədqiqat və İnnovasiya Proqramı çərçivəsində maliyyələşərək keçirilir.
