Gəncədə heyvandarlıqla bağlı tədbir keçirilib. Bu haqda 21 sentyabr tarixində ADAU-ya istinadən məlumat veririk.
Azərbaycan Dövlət Aqrar Universitetində (ADAU) kənd təsərrüfatı nazirinin müavini İlhamə Qədimovanın rəhbərliyi ilə “Kənd təsərrüfatı haqqında” Qanun layihəsinin heyvandarlığa həsr edilən maddələri başda olmaqla müzakirəsi baş tutub. İclasda ADAU-nun rektoru Zəfər Qurbanov, kənd təsərrüfatı nazirinin müşaviri Zaur Əliyev, Heyvandarlığın təşkili və monitorinqi şöbəsinin müdiri Bayandur Rzayev, AXA-nın sədr müavini Eldar Həsənov, Heyvandarlıq Elmi-Tədqiqat İnstitutunun direktoru Mahir Hacıyev, Respublika Süni Mayalanma Mərkəzinin direktoru Elton Abdurahmanov, Goranboy və Göygöl rayonu DAİM-lərinin direktorları və universitetin müvafiq əməkdaşları iştirak ediblər.
Qanun layihəsinin müzakirəsi zamanı universitetin heyvandarlıqla bağlı müvafiq fakültələrinin professor-müəllim heyəti öz təklif və fikirlərini bildirib, mövzu ətrafında müzakirələr aparılıb.
Sonra İlhamə Qədimova ADAU-nun maddi-texniki bazası ilə tanış olub.
