ADA Universitetinin əməkdaşları Gəncəyə səfər ediblər. Bu haqda 14 mart tarixində GDU-ya istinadən məlumat veririk.
Bakıdan gələn qonaqlar Gəncə Dövlət Universitetinin tələbələri ilə görüş keçiriblər. Burada GDU-nun yuxarı kurs tələbələri iştirak ediblər. Görüşdə təhsil müəssisəsinin Humanitar məsələlər üzrə prorektoru Gülsüm Fətəliyeva çıxış edərək ADA Universiteti haqqında məlumat verib.
ADA-nın əməkdaşları Nəzrin Əlizadə, Ləman Hüseynli və professor Fuad Hacıyev çıxışlarında universitetin dünya təhsil sistemində tutduğu mövqeyi, əldə edilən uğurları və universitetin Qazax Mərkəzi haqqında danışıblar. Magistr ixtisasları, ora qəbul qaydaları və digər imkanlar barədə tələbələrə geniş məlumat verilib.
Sonda tələbələrin sualları cavablandırılıb.
