"Gəncə" basketbol üzrə Azərbaycan Kubokunun finalında "Sabah"a 89:82 hesabı ilə qalib gələrək titula sahib çıxıb.
İdman.biz-ə danışan komandanın forvardı Cəbrayıl Əkbərov görüşün gərgin və emosional keçdiyini bildirib:
"Final həyəcan və adrenalinlə dolu idi. "Sabah" müntəzəm mövsümün ən güclü komandasıdır, üç ildir Liqanın çempionudur. Belə səviyyəli legionerlərə qarşı oynamaq çox çətindir".
Oyunda ilk hissəni 26:21 öndə başa vuran "Gəncə" sonuncu periodun ortalarınadək hesabda geri düşsə də, yekunda üstünlüyü ələ alıb. Əkbərov rəqibin arxayınlaşdığını vurğulayıb:
"Düşünürəm ki, "Sabah" tez sevindi və zəiflik göstərdi. Basketbolda hətta 10 saniyə çox şeyi dəyişə bilər. Fürsətdən istifadə edib onları yaxaladıq və bundan sonra toparlana bilmədilər".
