Gəncədə dəfn olunan daha bir şəhidin məzar yeri dəyişdirilib. Bu haqda 25 may tarixində Report-a istinadən məlumat veririk.
Söhbət şəhərimizdəki Şəhidlər xiyabanında naməlum şəhid kimi dəfn edilmiş Birinci Qarabağ müharibəsində itkin düşmüş hesab olunan Nuhu Mustafa oğlu Mustafayevdən gedir. Qəhrəmanımızın meyitinin qalıqları Ağsu rayonuna aparılıb. Burada Qaraməmmədli kəndində ailəsinə təhvil verilib. Onunla vida mərasimi keçirilib.
Daha sonra Mustafayev Ağsu rayonu Şəhidlər xiyabanında dəfn olunub. Mərasimdə şəhidin doğmaları, Ağsu Rayon İcra Hakimiyyətinin vəzifəli şəxsləri, rayon hüquq-mühafizə orqanlarının əməkdaşları, hərbçilər və ictimaiyyət nümayəndələri iştirak ediblər.
Qeyd edək ki, Nuhu Mustafa oğlu Mustafayev 22 avqust 1972-ci ildə Ağsu rayonunun Qaraməmmədli kəndində anadan olub. O, 1994-cü il fevralın 14-də Kəlbəcər rayonunun Təkəqaya kəndi ərazisində itkin düşüb.
