Gəncə Ağır Cinayətlər Məhkəməsində qəsdən sağlamlığa ağır zərər vurma, qanunsuz silah gəzdirmə və oğurluqda təqsirləndirilən Ramiz Budaqov və yalnız oğurluqda ittiham olunan qohumu Səlim Əkbərzadənin (ad-soyadlar şərtidir) cinayət işi üzrə hökm elan olunub.
Pravda.аz xəbər verir ki, məhkəmənin hökmü ilə Ramiz Budaqov 4 il 11 ay 28 gün müddətinə azadlıqdan məhrum edilib və hökm oxunduqdan sonra birbaşa məhkəmə zalında həbs olunub. Səlim Əkbərzadə isə 1 il 5 ay 26 gün müddətinə azadlığın məhdudlaşdırılması cəzasına məhkum edilib.
İstintaqa görə, Ramiz Budaqov 2023-cü il mayın 31-də Göygöl rayonunda baş verən mübahisə zamanı tanışına bıçaqla xəsarət yetirərək onun sağlamlığına ağır zərər vurub, həmçinin qanunsuz olaraq soyuq silah gəzdirdiyi müəyyən edilib.
Bundan başqa, Ramiz Budaqov qohumu Səlim Əkbərzadə ilə qabaqcadan əlbir olaraq Daşkəsən rayonu ərazisində iki ayrı epizod üzrə ümumilikdə 12 baş iri buynuzlu heyvanı oğurlayıb və satmaqla zərərçəkmişlərə xeyli miqdarda maddi ziyan vurub.
