Gəncə universitetinə daxil olan şəxs qazi olduqdan sonra təhsilini davam etdirə bilmir.
Gencexeber.az Elm və Təhsil üzrə Dövlət Agentliyinə istinadən məlumat verir ki, məsələ ilə bağlı irəliləyiş əldə olunub. Agentlikdə bildirilib ki, Vətən müharibəsi qazisi Valeh İsayevin təhsilini davam etdirməsi üçün şərait yaradılacaq.
Qurumun rəsmiləri onunla Bakı Reabilitasiya Mərkəzində görüşüblər. Valeh müharibədə ağır yaralanaraq hərəkət qabiliyyətini itirməsinə baxmayaraq təhsilini davam etdirmək istəyini bildirib. Görüş zamanı Agentlik nümayəndələri qazinin müraciətini dinləyib və onun xüsusi vəziyyəti nəzərə alınaraq qanunvericilik çərçivəsində təhsil hüququnun təmin olunması üçün uyğun tədbirlərin görüləcəyini bildiriblər.
Xatırladaq ki, yaxın zamanda mediada qazinin bacısı tərəfindən İsayevin sağlamlıq vəziyyəti ilə bağlı təhsilini davam etdirə bilməməsi barədə müraciəti yayılıb. Araşdırma zamanı məlum olub ki, Valehin təhsilinin bərpası ilə bağlı Agentliyə və ya qəbul olduğu universitetə müraciəti daxil olmayıb. Bununla yanaşı, məsələ Elm və Ali Təhsil üzrə Dövlət Agentliyi tərəfindən nəzarətə götürülüb.
Qeyd edək ki, qazi 4 il öncə Gəncə Dövlət Universitetinin Tarix-coğrafiya fakültəsinə qəbul olub, müharibəyə könüllü yazıldığından ora yollanıb və təhsil ala bilməyib. Sonradan yaralanaraq hərəkət qabiliyyətini tamamilə itirib. Amma hər hansı əqli problemi yoxdur. Bununla belə, universitetdə təhsilinə başlaya bilməyib.
