Xəbər verdiyimiz kimi, ötən gün Samuxda məktəbdə keçirilən "Son zəng" mərasimində bayağı musiqi səsləndirilməsinə görə işdən azad olunan məktəb direktorunun vəzifəsinin bərpa edilməsi ilə bağlı məlumat yayılmışdı.
Ancaq məlum olub ki, məktəb direktoru vəzifəsinə qaytarılmayıb.
Bu barədə Məktəbəqədər və Ümumi Təhsil üzrə Dövlət Agentliyi məlumat yayıb.
“Samux rayonu İnstitut qəsəbə tam orta məktəbin işdən çıxarılan direktoru Gülsafa Abbasovanın Nərimanov Rayon Məhkəməsinin qərarına əsasən, vəzifəsinə geri qaytarılması ilə bağlı bildiririk ki, bu, birinci instansiya məhkəməsinin qanuni qüvvəyə minməmiş qərarıdır. Məhkəmə prosesi hazırda davam edir. Agentliyi tərəfindən yuxarı instansiya məhkəməsinə müraciət ediləcək”, məlumatda qeyd olunub.
Bəs hazırda Samux rayonu İnstitut qəsəbə tam orta məktəbində direktor vəzifəsini kim icra edir?
Gencexeber.az-a Gəncə-Daşkəsən Regional Təhsil İdarəsindən bildirilib ki, məktəbdə direktor vəzifəsini məktəbin məktəbdənkənar və sinifdənxaric tərbiyə işi üzrə təşkilatçısı əvəz edir.
