Xəbər verdiyimiz kimi, noyabrın 19-da Bakıda yerləşən "Təmiz Dünya" Qadınlara Yardım İB-nin sığınacağında yaşayan 16 yaşlı Nurcan Cəfərova həyatını itirib. Sosial Xidmətlər Agentliyinin məsələ ilə bağlı yaydığı açıqlamada qeyd olunub ki, Atası Elşad Səfərov ölkəyə qayıtdıqdan sonra 18 noyabr 2025-ci il tarixində uşaqdan rəsmi qaydada imtina edib.
Mövzu ilə bağlı yeniavaz.com-a danışan vəkil Anar Məmişov isə bildirib ki, heç bir halda valideyn öz övladından könüllü şəkildə imtina edə bilməz.
"Qanunvericilikdə valideynin övladdan imtinası anlayışı yoxdur".
Anar Məmişov qeyd edib ki, qanunvericilikdə valideynin övladdan imtinası anlayışı yoxdur, valideyn yalnız məhkəmənin qərarı ilə valideynlik hüququndan məhrum edilə bilər:
"Bununla bağlı iddianı yalnız digər valideyn, prokurorluq orqanı və ya qəyyumluq–himayəçilik orqanı qaldıra bilər. Məhkəmə valideyni valideynlik hüququndan yalnız onun vəzifələrini yerinə yetirməməsi, aliment ödəməkdən yayınması, valideynlik hüququndan sui-istifadə etməsi, alkoqol və narkotik asılılığı olması, uşağa qarşı cinsi istismar və ya zorakılıq törətməsi, eləcə də ər-arvadın bir-birinə qarşı qəsdən cinayət törətməsi hallarında məhrum edə bilər. Lakin məhrum edilən valideynin bəzi vəzifələri hələ də qüvvədə qalır".
Vəkil əlavə edib ki, valideyn övladını uşaqlar evinə versə belə, onun bütün vəzifə öhdəliyi bitmir: "Belə hallarda valideyn övladı üzərində hüquqlarını itirmir. Bu yalnız valideynin valideynlik hüququndan məhrum edildiyi hallarda mümkün ola bilər".
