Gəncə şəhərində 1998-ci il təvəllüdlü İslam şəxsi münasibətlər zəminində yaranan mübahisə zamanı qeyri-rəsmi münasibətdə olduğu Xalidəyə (adlar şərti verilib – red.) xəsarət yetirib.
Demokrat.аz-ın əldə etdiyi məlumata görə, hadisə 19 fevral 2023-cü ildə baş verib. İslam həmin gün axşam saatlarında qeyri rəsmi ər-arvad münasibətində olduğu Xalidə ilə ailə daxili münasibətlər zəminində yaranmış mübahisə zamanı onu yumruqla vurub. Ona müxtəlif dərəcəli bədən xəsarətləri yetirib.
Hadisəni törədən İslamın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən İslam ona elan olunmuş ittiham üzrə özünü təqsirli bilib. O, ifadəsində göstərib ki, 2022-ci ilin oktyabr ayında Xalidə ilə “TikTok" sosial şəbəkəsində tanış olub və aralarında sevgi münasibətləri yaranıb.
İş üzrə zərərçəkmiş qismində ifadə verən Xalidənin sözlərinə görə, heç bir yerdə işləmir və evdar qadındır: “İslam ilə təxminən hadisədən 5 ay əvvəl tanış olmuşam. Onunla qeyri rəsmi ər-arvad münasibətində olmuşam. Hadisə günü, axşam saatlarında yaşadığımız evdə olan zaman İslam mənə ev işlərini görməyimi bildirdi, mənimlə mübahisə etdi. Məni nalayiq ifadələr ilə söyüb təhqir etdi. Sonra isə üzərimə gələrək əl və ayaq zərbələri ilə bədənimin müxtəlif nahiyələrinə vuraraq məni döydü. Həmin zaman evdə bizdən başqa İslamın atası Cəlil və dostu Vüsal adlı şəxs olub”.
Bu cinayət işinə Gəncə Şəhər Məhkəməsində baxılıb. Məhkəmənin hökmü ilə İslam aylıq qazancından dövlət nəfinə 15 faiz məbləğində pul tutulmaqla 6 ay müddətinə islah işləri cəzasına məhkum edilib.
