Gəncədə saxlanılan narkokuryerin üzərindən heroin aşkarlanıb. Bu haqda 27 iyun tarixində Daxili İşlər Nazirliyinə istinadən xəbər veririk.
Baş Polis İdarəsinin Narkotiklərlə Mübarizə Bölməsinin əməkdaşları tədbirlər həyata keçiriblər. Nəticədə narkokuryerlik edən əvvəllər məhkum olunmuş Rafael Zeynalov saxlanılıb. Ondan 20 kiloqram 755 qram “heroin” aşkar edilib.
Araşdırmalar zamanı müəyyən edilib ki, R. Zeynalov İran vətəndaşları ilə sosial şəbəkə üzərindən əlaqə yaratmaqla ölkə ərazisinə qeyri-qanuni yolla gətirilərək Gəncə şəhəri ərazisində gizlədilən narkotiki öz istifadəsi və satış üçün əldə edib. Saxlanılan şəxs kuryer fəaliyyətini pul və narkotik müqabilində həyata keçirdiyini bildirib.
Faktla bağlı Gəncə Şəhər Baş Polis İdarəsində cinayət işi başlanıb, saxlanılan şəxs barəsində həbs qətimkan tədbiri seçilib.
Araşdırmalar davam etdirilir.
