Gəncə Apellyasiya Məhkəməsində qəsdən sağlamlığa ağır zərər vurmaqda təqsirləndirilən Uğur Pənahovun (adı, soyadı şərtidir) barəsində verilmiş hökmə baxılıb.
Gencexeber.az bildirir ki, Hakim Müşfiq Məmmədovun sədrliyi ilə keçirilən iclasda apellyasiya şikayətinin detalları açıqlanıb.
İttihama görə, hadisə 16 noyabr 2023-cü ildə Gədəbəy şəhərində yerləşən avtoyuma məntəqəsində baş verib. Təqsirləndirilən şəxs ilə tanışı arasında yaranan mübahisə zamanı Uğur Pənahov yerdən götürdüyü dəmir parçası ilə zərərçəkmiş İbrahim İbrahimova zərbələr endirib və ona ağır xəsarətlər yetirib.
Gəncə Ağır Cinayətlər Məhkəməsinin hökmü ilə Uğur Pənahov 3 il 6 ay müddətinə azadlıqdan məhrum edilib. Müdafiə tərəfi xəsarətlərin ağır deyil, az ağır olduğunu bildirərək hökmün ləğvini və ya daha yüngül cəza təyin edilməsini xahiş edib.
Apellyasiya məhkəməsi şikayəti qismən təmin edib, hökm dəyişdirilərək Uğur Pənahovun cəzası 3 il 6 aydan 3 ilə endirilib.
