Azərbaycanda ən çox yeyilən fastfud növü demək olar ki, dönərdir. Təəssüflər olsun ki, illərdir dönərlə bağlı problemlər gündəmdən düşmür. Sonuncu dəfə Qazaxda tələbələr, Tovuzda sakinlər dönərdən kütləvi zəhərlənmişdi. Hər il dönərxanalarda nöqsanlar aşkar edilir.
Ötən gün isə Azərbaycan Qida Təhlükəsizliyi Agentliyi dönər istehsalı ilə bağlı yeni tələblər qəbul edib. Maraqlısı budur ki, dönərlər sadəcə dönərxanalarda verilmir. Kafe və restoranların menyularında da dönər yer alır.
Bəs müştəri həmin dönərin AQTA-nın nəzarətindən keçdiyini necə bilsin?
Azad İstehlakçılar İctimai Birliyinin sədri Eyyub Hüseynov bizim.media-ya bildirib ki, bunu bilməyin heç bir yolu yoxdur.
“AQTA xüsusi bir sənəd hazırlamır ki, biz insanlara deyək ki, o sənəd olanda bilin ki, bu təhlükəsiz qidadır. Əvvəllər sertifikat anlayışı var idi. Bununla məhsulların təhlükəsizliyini ölçmək olurdu. İndi isə bu yoxdur. Azərbaycanda qidadan zəhərlənməmələrlə bağlı statistikalar da gizlədilir. Dövlət qurumları da o statistikalara uyğun qərar verdiyi üçün məsələnin nə dərəcədə ciddi olduğunu görmürlər. Həm də AQTA bu qədər sahəyə nəzarət edə bilməyəcək. Ona görə, ictimaiyyətlə sıx əlaqədə işləməlidirlər”.
