Göygöl rayonunun Topalhəsənli kənd tam orta məktəbində təmir işləri hələ də yekunlaşmayıb.
Gencexeber.az-a daxil olan şikayətə görə, Gəncə-Daşkəsən Regional Təhsil İdarəsinin tabeliyində fəaliyyət göstərən məktəbin yeni tədris ilinə hazırlıq çərçivəsində istifadəyə veriləcəyi aidiyyəti qurum tərəfindən bildirilsə də, işlər başa çatdırılmayıb.
Vətəndaşların sözlərinə görə, məktəb 2024-cü ilin may ayından sökülərək yenidən tikilir. Lakin yeni tədris ilinin sabah başlanmasına baxmayaraq, tikinti işləri hələ də davam edir.
Valideynlər iddia edirlər ki, dövlət büdcəsindən vəsaitin tam həcmdə Təhsil Nazirliyi tərəfindən ayrıldığı bildirilib. Onların sözlərinə görə, təmir işlərini həyata keçirən "Rövşən Oğuz" MMC tərəfindən cəlb olunan tikinti briqadasının üzvləri əməkhaqlarını ala bilmədiklərini və bu səbəbdən işləri davam etdirməkdə çətinlik çəkdiklərini bildiriblər.
Məktəbin hazır olmaması isə kənd sakinləri və valideynlər üçün ciddi narahatlıq yaradıb. Belə ki, şagirdlər müvəqqəti olaraq Göygöl şəhərindəki məktəblərə səpələniblər.
Valideynlərdən biri bildirib ki, övladı həmin məktəbdə ikinci növbədə oxuyur. Dərslər saat 14:00-da başlayır və 20:30-da başa çatır. Bu isə kənddən şəhərə gedib-gələn uşaqların gec saatlarda evə qayıtmasına səbəb olur.
Sakinlər Topalhəsənli kənd tam orta məktəbinin yaxın vaxtlarda şagirdlərin istifadəsinə veriləcəyini ümid edirlər.
Məsələ ilə bağlı redaksiyamız tərəfindən Gəncə-Daşkəsən Regional Təhsil İdarəsinə sorğu ünvanlanıb.
