Gəncədə yeni zavodun tikintisi sakinlər tərəfindən birmənalı qarşılanmayıb. Bu haqda Gencexeber.az 17 fevral tarixində məlumat verir.
Son günlərdə gündəmdə olan məsələlərdən biri Gəncədə ilk sənaye əhəmiyyətli partlayıcı maddələr istehsal edəcək zavodun tikintisidir. Ümumi sahəsi 5 min 665 kvadratmetr olan zavodun Kəpəz rayonunda, 15 hektar ərazidə inşası başlayıb.
Bu xəbər sakinlər tərəfindən birmənalı qarşılanmayıb. İzləyicilərimizin bir hissəsi yeni iş yerlərinin açılacağı, iqtisadiyyatın inkişaf edəcəyinə sevinsə də, əksəriyyət zavodun tikintisindən narazılıq bildirib. Sakinlərin sözlərinə görə, onlar şəhərin raket atəşinə tutulmasından sonra travma yaşayırlar və partlayış səsləri gələndə təlaşa düşürlər.
İzləyicilərimiz havanın çirklənəcəyi üçün narahatdırlar. Onlar bu cür istehsal müəssisələrinin şəhərdən, yaşayış yerlərindən uzaqda tikilməsini arzu edirlər.
Sakinlər “Axı niyə Gəncədə? Neçə il alüminium zavodunun zəhərli tüstüsü ilə yaşadıq. İndi də partlayıb göyə uçarıq yəqin”, “Partlayıcı istehsal edən zavod təhlükə mənbəyidir”, “Belə bir zavod əslində şəhərdə tikilməməlidir. İnsanların yaşadığı yerdə tikilməsi nə dərəcədə düzgündür?” və s. kimi şərhlərlə narazılıq bildirirlər.
Bundan başqa, şəhər əhalisi illər öncə fəaliyyətini dayandırmış müxtəlif zavodların yenidən işə salınmasını istəyirlər. “Farfor zavodu, Konditer fabrikasi, Büllur zavodunu işə salsınlar”, - deyə izləyicilər yazırlar.
