Gəncənin Hacı Zeynalabdin Tağıyev küçəsində, 10 saylı Gəncə Ərazi Ekologiya və Təbii Sərvətlər Şöbəsinin yaxınlığında qəzalı vəziyyətdə olan çinar ağacının iri budaqlarından biri sınaraq yola düşüb.
Gencexeber.az-ın məlumatına görə, budaq hadisə zamanı xoşbəxtlikdən ərazidən keçən insanların üzərinə düşməyib və bədbəxt hadisə baş verməyib.
Sakinlər bildirirlər ki, ağacın təhlükəli vəziyyətdə olması ilə bağlı aidiyyəti qurumlara dəfələrlə müraciət edilib. Lakin onların iddiasına görə, indiyədək problemin aradan qaldırılması istiqamətində tədbir görülməyib.
Sakinlər narahatlıq keçirərək bildirirlər ki, hər gün həmin ərazidən keçərkən ağacın və digər budaqların qəfil qoparaq insanların və avtomobillərin üzərinə düşməsindən qorxurlar.
Onlar aidiyyəti qurumlardan ərazidəki çinar ağacına baxış keçirilməsini və təhlükənin aradan qaldırılmasını xahiş edirlər.
