Xəbər verdiyimiz kimi, Gəncə Beynəlxalq Hava Limanı yolunun 2-ci kilometrində, şəhər istiqamətində cari ilin iyul ayında istifadəyə verilən yeni Yanacaq Doldurma Məntəqəsində xoşagəlməz hadisə baş verib.
Gencexeber.az xəbər verir ki, Umut Tamer Tosuna məxsus "BYD Destroyer" markalı, benzin mühərrikli avtomobilin çəninə Aİ-92 markalı benzin əvəzinə məntəqə əməkdaşları tərəfindən səhvən dizel yanacağı vurulub. Nəticədə avtomobili işə salmaq mümkün olmayıb.
Hadisə ilə bağlı zərərçəkən Gencexeber.az-a açıqlamasında bildirib ki, xəbər dərc ediləndən sonra məsələ artıq müsbət şəkildə həllini tapıb:
"Birbaşa məntəqə rəhbəri mənimlə əlaqə saxladı. Maşını özü aparıb təmir etdirdi və problem aradan qaldırıldı. Maşınımı işlək vəziyyətdə təhvil verdilər".
Zərərçəkən əlavə edib ki, maşınsız qaldığı vaxta görə yanacaq da hədiyyə edilib.
