Gəncədə yeni SOCAR yanacaqdoldurma məntəqəsində yanacaq qalmaqalı olub.
Gencexeber.az-ın məlumatına görə, "R-50" Gəncə Beynəlxalq Hava Limanı yolunun 2-ci kilometrində, şəhər istiqamətində cari ilin iyul ayında istifadəyə verilən yeni Yanacaq Doldurma Məntəqəsində xoşagəlməz hadisə baş verib.
Umut Tamer Tosuna məxsus "BYD Destroyer" markalı, benzin mühərrikli avtomobilinin çəninə Aİ-92 markalı benzin əvəzinə məntəqənin əməkdaşları tərəfindən səhvən dizel yanacağı vurulduğu iddia olunub. Nəticədə avtomobili işə salmaq mümkün olmayıb.
Zərərçəkənin iddiasına görə, SOCAR məntəqəsinin rəhbərliyi və işçiləri məsuliyyətdən yayınaraq problemi sürücünün öz hesabına aradan qaldırmasını tələb ediblər.
"Dedilər ki, düzəltməyə pulumuz yoxdur, öz vəsaitiniz hesabına düzəldin, maaşımızı alanda gəlib pulunuzu götürərsiniz", – Umut Tamer Tosun bildirib.
Onun sözlərinə görə, hadisə dünən saat 19:00 radələrində baş verib. Şikayətçi tələbinin yerinə yetirilməsi üçün gecə saatlarınadək məntəqə ərazisində gözləsə də, nəqliyyat vasitəsinin təmiri ilə bağlı heç bir tədbir görülməyib. Məntəqə rəhbəri məsuliyyəti üzərindən ataraq, "mən cavabdeh deyiləm, işçi ilə özünüz həll edin" cavabı verib.
Hadisə şahidlərinin bildirdiyinə görə, həmin vaxt məntəqədə "Nissan Note" markalı digər avtomobilə də benzinin əvəzinə dizel yanacağı vurulub. Lakin bu məsələ ilə bağlı da heç bir cavabdeh şəxs üzə çıxmayıb.
